Comanaged حكومة
Wed, 13/09/2006 - 18:37 — ezabi
الموضوع ببساطة ان الونش اللي بيشيل العربيات عند سيتي ستارز طلع مش ونش مرور انما عربية بنمر نقل واللي سايقها مدني.
يعني لما يشيل عربية راكنة في الشارع من غير وجود صاحبها تبقى جناية دة غير مخالفته لقانون المرور وانه مركب سارينة مضروبة داوشنا بيها ليل ونار من غير تصريح.
لحد هنا وماشي، ماهي سايبة، المهم لما مجموعة من العاملين هناك تضرروا وراحوا يعملوا محضر الضابط قاللهم ان المحضر زي قلته عشان المرور متفق مع ادارة سيتي ستارز على الموضوع ده، سيتي ستارز يشتروا الونش والمرور يفوت الموضوع وعلى المتضرر أن يشرب من البحر.
والأدهى بقى التبرير من أمن سيتي ستارز ان أي عربية من العربيات اللي واقفة ممكن تكون حاطه قنبلة، طبعا كلامه منطقي جدا عشان كلنا عارفين كويس ان اللي عاوز يحط قنبلة مش مستعد يركن العربية الملغمة في جراج السنتر عشان التذكرة غالية...
وبناء على هذا الاختراع الأمني الفذ أقترح منع أي سيارة انها تركن في أي حتة حفاظا على أرواح المواطنين.
يبدو ان المرور حيبقى ادارة مشتركة (comanaged) وممكن يتخصخص بعد كده.
كام سؤال بيطرحو نفسهم:
-المرور خلاص ماعندوش فلوس لدرجة انه يسمح بارتكاب جناية؟ أمال الضريبة والمخالفات اللي بندفعها مع الرخص بتروح فين؟
-الشارع اللي أنا وانت دافعين تكاليفه ده من الضرايب، مين له الحق يسيطر عليه؟ عشان لو كده يبقى عاوز حقي في الليلة.
-الاخوة خبراء الأمن الجامدين، هو مش في حاجة بتقول اللي عاوز يعمل أي حاجة حيعملها وان الحماية الزيادة لأي مكان بتخليه مستهدف أكتر من غيره؟ ده طبعا على فرض ان نظرية الأخ بتاع الأمن دي هي فعلا السبب.
ياريت لو حد عنده أي اجابة منطقية يقوللي، أفيدوني أفادكم الله.
Comments
عادي، خليك استثماري
بصفتى رجل راسمالى:
Post new comment